素兰道：“说到后底事体，大家看勿见，怎晓得有结果无结果？我想无拨啥法子，过一日末是一日，碰去看光景。”瑶官插说道：“倪末来里过一日是一日。耐个后底事体，有点数目来浪。华老爷搭耐好得非凡，嫁得去末，端正享福好哉，阿有啥看勿见？”素兰失笑道：“耐倒说得写意哚。要是实概说起来，齐大人也蛮好（口宛），耐两家头为啥勿嫁拨仔齐大人嗄？”瑶官道：“耐末说说正经就说到仔歪里去！”琪官点头道：“闲话倒也是正经闲话，总归做仔个女人，大家才有点说匆出个为难场花，外头人陆里晓得？单有自家心里明白。想来耐华老爷好末好，终勿能够十二分称心阿对？”

素兰抵掌道：“耐个闲话故末蛮准，可惜我匆是长住来里，住来里仔同耐讲讲闲话，倒无啥。”瑶官道：“故也陆里说得定？倪出去也匆晓得，耐进来也匆晓得，耐说个‘碰去看光景’。”琪官道：“我说大家闲话对景仔，倒勿是定归要来浪一堆；就匆来浪一堆，心里也好像快活点。”素兰闻言，欣然倡议道：“倪三个人索性拜姊妹阿好？”瑶官抢说：“蛮好，拜仔末大家有照应。”

琪官正待说话，只听得外面“历历碌碌”，不知是何声响。琪官胆小，取只手照拉同瑶官出外照看。那月早移过厢楼屋脊，明星渐稀，荒鸡四叫，院中并无一些动静。两人各处兜转来，却惊醒了榻床上大姐，迷糊著两眼，问是“做啥”。两人说了，大姐道：“下头来浪响呀。”说著，果然“历历碌碌”响声又作，乃班里女孩儿睡在楼下，起来便遗。两人呼问明白，放心回房，随手掩上房门，向素兰道：“天要亮哉，倪困罢。”素兰应诺。瑶官再请素兰用些茶点，收拾干净，自去间壁自己房间睡下。琪官爬上大床，并排铺了两条薄被，请素兰宽衣，分头各睡。

素兰错过睡性，翻来覆去睡不著；听琪官寂然不动，倒是间壁瑶官微微有些鼻声。俄而一只乌鸦“哑哑”叫著，掠过楼顶。素兰揭帐微窥，四扇玻璃窗倏变作鱼肚白色，轻轻叫琪官不答应，索性披衣起身，盘坐床中。不想琪官并未睡著，仅合上眼养养神，初时不应，听素兰起坐，也就撑起身来，对坐攀话。

素兰道：“耐说倪拜姊妹阿好？”琪官道：“我说勿拜一样好照应，拜个啥嗄？要拜末今朝就拜。”素兰道：“好个，今朝就拜。那价个拜法囗？”琪官道：“倪拜姊妹，不过拜个心。摆酒送礼多花空场面，才用勿著，就买仔副香烛，等到夜头，倪三个人清清爽爽，磕几个头末好哉（口宛）。”素兰道：“蛮好，我也说写意点好。”

琪官见天已大明，略挽一挽头发，跨下床沿，趿双拖鞋，往床背后去。一会儿，出来净过手，吹灭梳妆台上油灯，复登床拥被而坐，乃从容问素兰道：“倪拜仔姊妹，赛过一家人，随便啥闲话才好说个哉。我要问耐，倪看个华老爷无啥（口宛），为仔啥勿称心嗄？”素兰未言先叹道：“（要勿）说起，说起仔末真真讨气！俚乃个人倒勿是有啥个勿称心，我同俚样色样蛮对景，就为仔一样勿好。俚乃个人做一百桩事体末，定归有九十九桩勿成功哚。有点干己个事体，俚乃生来勿肯做。就教俚做桩小事体，俚乃要四面八方通通想到家，是匆要紧个，难末再做；倘然有个把闲人说仔一声勿好，就匆做个哉。耐想实概个脾气，阿能够讨我转去？俚自家要讨也匆成功。”琪官道：“倪一径来里说，先生小姐要嫁人，容易得势，陆里一个好末就嫁拨仔陆里一个，自家去拣末哉。故歇听耐说华老爷，例划一为难。”

素兰转而问道：“我也要问耐，耐两家头自家算计，阿嫁人勿嫁人？”琪官亦未言先叹道：“倪末再要为难也无拨！故歇无啥人来里，搭耐说说勿要紧。倪从小到个该搭，生来才要依个大人，依仔哉（口宛），故末真间架。大人六十多岁年纪哉，倘忙出仔事体下来，像倪上勿上下勿下，算啥等样人嗄？难要想着仔嫁人末，晚哉！”素兰道：“坎坎瑶官来浪说，出去也说勿定，阿是实概个意思？”琪官道：“俚乃肚皮里还算明白，就不过有点勿着落。看仔末十四岁，一点勿懂轻重，说得说勿得才要说出来。耐想倪故歇阿好说该号闲话？坎坎幸亏是耐，碰着别人说拨大人听仔末，也好哉！”

琪官一面说，一面打了个呵欠。素兰道：“倪再困歇罢。”琪官道：“生天要困囗。”素兰便也往床背后去了一遭，却见一角日光直透进玻璃窗，楼下老婆子正起来开门，打扫院子，约摸七点钟左右，两人赶紧复睡下去。素兰道：“晚歇耐起来末喊我一声。”琪官道：“晚点末哉，勿要紧个。”这回两人神昏体倦，不觉沉沉同人睡乡。

直至下午一点钟，两人始起。瑶官闻声进见，笑诉道：“今朝一桩大笑话，说是花园里逃走两个倌人。几花人来浪反，一径反到我起来，刚刚说明白。”素兰不禁一笑。

琪官吩咐老婆子传话于买办，买一对大蜡烛，领价现交，无须登帐。素兰亦吩咐其大姐道：“耐吃过仔饭末，到屋里去一埭，回来再到乔公馆问俚阿有啥闲话。”大姐承命，和老婆子同去。

瑶官急问：“阿是倪今朝拜姊妹？”素兰颔首。琪官道：一耐闲话当心点个囗！啥个逃走倌人，倘然冠香来里，阿是要多心嗄？就是倪拜姊妹，也（要勿）去搭冠香说。冠香晓得仔，定归要同倪一淘拜，无趣得势。”瑶官唯唯承教，并道：“我一径勿说末哉。”素兰道：“勿曾拜末（要勿）说起，拜过仔就勿要紧。故是倪明明白白正经事体，无拨啥对勿住人个场花。”瑶官又唯唯承教。

说话之间，苏冠香恰好来到，先于楼下向老婆子问话。琪官听得，忙去楼窗口叫“先生”。冠香上来厮见，爱致主人之命，立请素兰午餐。素兰即辞了琪官、瑶官，跟着冠香由梨花院落往拜月房栊。

齐韵叟既见孙素兰，就道：“昨日夜头，俚哚才匆来浪，我倒勿曾想着；难教冠香来陪陪耐，再一夜天末铁眉来哉。”素兰慌道：“倪（要勿）呀，梨花院落蛮蛮适意。今朝夜头说好来浪，原到几首去。”韵叟道：“价末让冠香一淘到梨花院落来，讲讲闲话有淘伴，起劲点。”素兰道：“倪（要勿）呀，倪同冠香先生一样个（口宛）。大人当仔倪客人，倪倒勿好意思住来里，要转去哉。”苏冠香听说，将韵叟袖子一拉，道：“耐勿懂末再要瞎缠。俚哚梨花院落闹热得势，我去做啥嗄？”韵叟笑而置之。

不多时，陶玉甫、李浣芳、朱淑人、周双玉都回说不吃饭了，高亚白、姚文君、尹痴鸳相继并至，大家入席小酌。高亚白、姚文君宿醉醺然，屏酒不饮。尹痴鸳疲乏尤甚，揉揉眼，伸伸腰，连饭吃不下。齐韵叟知道孙素兰好量，令苏冠香举杯相劝。素兰略一沾唇，覆杯告止。

餐毕，大家各散。尹痴鸳归房歇息，高亚白、姚文君随意散步，孙素兰也步出庭前。苏冠香留心探望，见素兰仍望梨花院落一路上去。冠香因笑着，欲和齐韵叟说话；转念一想，又没有甚么话，便缩住口不说了。韵叟觉得，问道：“耐要说啥说末哉。”冠香思将权词推托，适值小青来请冠香，说是姨太太要描花样。冠香眼视韵叟，候其意旨。韵叟方将歇午，即命冠香：“去末哉。”冠香道：“阿要去喊琪官来？”韵叟一想道：“（要勿）喊哉。”冠香叮嘱帘外当值管家小心伺候，自带小青往内院去了。

韵叟睡足一觉，钟上敲四点，不见冠香出来。自思那里去消遣消遣，独自一个信着脚儿踱去，竟不觉踱过花园腰门，这腰门系通连住宅的。大约韵叟本意欲往内院寻冠香，忽又想起马龙池，遂转身往外，到书房里谒尼龙池，相对清谈，娓娓不倦。