打个辰光，俚咬紧点牙齿，一声勿响；等到娘姨哚劝开仔，榻床浪一缸生鸦片烟，俚拿起来吃仔两把。老鸨晓得仔，吓煞哉，连忙去请仔先生来。俚勿肯吃药（口宛），骗俚也匆吃，吓俚也勿吃。老鸨阿有啥法子呢？后来老鸨对俚跪仔，搭俚磕头，说：‘从此以后，一点点勿敢得罪耐末哉。’难末算吐仔出来过去。”

陶云甫这一席话，说得罗子富忐忑鹊突，只是出神。在席的也同声赞叹，连倌人、娘姨等都听呆了。惟王莲生还在写票头，没有听见。及至写毕，交与娘姨，罗子富接过来看，原来是开的轿饭账，随即丢开。王莲生道：“耐哚酒啥勿吃哉，子富庄阿曾完嗄？”罗子富道：“我还有十杯勿曾豁。”莲生便教汤啸庵打庄。啸庵道：“玉甫也匆曾打庄（口宛）。”

一语未了，只听得楼梯上一阵脚声，直闯进两个人来，嚷道：“啥人庄？倪来打。”大家知道是请的那两位局里朋友，都起身让坐。那两位都不坐，一个站在台面前，揎拳攘臂，“五魁”“对手”，望空乱喊；一个把林素芬的妹子林翠芬拦腰抱住，要去亲嘴，口里哺哺说道：“倪个小宝宝，香香面孔。”林翠芬急得掩着脸弯下身去，爬在汤啸庵背后，极声喊道：“（要勿）吵囗！”王莲生忙道：“（要勿）去惹俚哚哭囗。”林素芬笑道：“俚哭倒勿哭个。”又说翠芬道：“香香面孔末碍啥？耐看鬓脚也散哉！”翠芬挣脱身，取豆蔻盒子来，照照镜子。素芬替他整理一回。幸亏带局过来的两个倌人随后也到，方拉那两位各向空高椅上坐下。王莲生问：“卫霞仙搭啥人请客？”那两位道：“就是姚季莼（口宛）。”莲生道：“怪勿得耐两家头才吃醉哚哉。”两位又嚷道：“啥人说醉嗄？倪要豁拳哉。”罗子富见如此醉态，亦不敢助兴，只把摆庄剩下的十拳胡乱同那两位豁毕，又说：“酒末随意代代罢。”蒋月琴也代了几杯。

罗子富的庄打完时，林素芬、翠芬姊妹已去。蒋月琴也就兴辞。罗子富乃乘机出席，悄悄的约同汤啸庵到里间房里去着了马褂，径从大床背后出房，下楼先走。

管家高升看见，忙喊打轿。罗子富吩咐把轿子打到尚仁里去。汤啸庵听说，便知他听了陶云甫的一席话，要到黄翠凤家去，心下暗笑。

两人踅出门来，只见弄堂两边车子、轿子堆得满满的，只得侧身而行。恰好迎面一个大姐从车轿夹缝里钻来挤住，那大姐抬头见了，笑道：“阿唷，罗老爷！”忙退出让过一傍。罗子富仔细一认，却是沈小红家的大姐阿金大，即问：“阿是来里跟局？”阿金大随口答应自去。

汤啸庵跟着罗子富一径至黄翠凤家。外场通报，大姐小阿宝迎到楼上，笑说：“罗老爷。耐有好几日勿请过来哉（口宛）。”一面打起帘子，请进房间。随后黄翠凤的两个妹子黄珠凤、黄金凤，从对过房里过来厮见，赶着罗子富叫“姐夫”，都敬了瓜子。汤啸庵先问道：“阿姐阿是出局去哉？”金凤点头应“是”。小阿宝正在加茶碗，忙按说道：“去仔一歇哉，要转来快哉。”罗子富觉得没趣，丢个眼色与汤啸庵要走，遂一齐起身，踅下楼来。小阿宝慌的喊说：“（要勿）去囗。”拔步赶来，已是不及。

第六回终。

第七回 恶圈套罩住迷魂阵 美姻缘填成薄命坑

按：黄翠凤的妹子金凤见留不住罗子富、汤啸庵两位，即去爬在楼窗口，高声叫：“无(女每)，罗老爷去哉！”那老鸨黄二姐在小房间内听了，急跑出来，恰好在楼梯下撞着，一把抓住罗子富袖子，说：“勿许去！”子富连道：“我无拨工夫来里。”黄二姐大声道：“耐要去末，等倪翠凤转来仔了去。”又嗔着汤啸庵道：“耐汤老爷倒也要紧哚（口宛），啥勿搭倪罗老爷坐一歇，说说闲话嗄。”

于是，不由分说，拉了罗子富上楼；叫小阿宝拉了汤啸庵，重到房间里来。黄二姐道：“宽宽马褂，多坐歇。”说着，伸手替罗子富解钮扣。金凤见了，也请汤啸庵宽衣。小阿宝摄了茶叶，随向啸庵手中接过马褂。黄二姐将子富脱下的马褂也授与小阿宝，都去挂在衣架上。

黄二姐一回头，见珠凤站在一傍，嗔他不来应酬，瞪目直视。吓得珠凤倒退下去，慌取了一支水烟筒，装与子富吸。子富摇手道：“耐去搭汤老爷装罢。”黄二姐问子富道：“阿是多吃仔酒哉？榻床浪去（身单）（身单）囗。”子富随意向烟榻躺下。小阿宝绞了手巾，移过一只茶碗，放在烟盘里，又请啸庵用茶。啸庵坐在靠壁高椅上，傍边珠凤给他装水烟。黄二姐叫金凤也取一支水烟筒来，遂在榻床前机子上坐了，自吸一口，却侧转头悄悄的笑向子富道：“耐阿是动气哉？”子富道：“动啥气嗄？”黄二姐道：“价末为啥好几日勿请过来？”子富道：“我无拨工夫（口宛）。”黄二姐鼻子里“哼”的一声，半晌，笑道：“说也匆差，成日成夜来哚老相好搭，阿有啥工夫到倪搭来嗄！”子富含笑不答。

黄二姐又吸了一口水烟，慢慢说道：“倪翠凤脾气是匆大好，也怪勿得耐罗老爷要动气。其实倪翠凤脾气末有点，也看客人起，俚来里罗老爷面浪，倒勿曾发过歇一点点脾气囗。汤老爷末也晓得点俚哉。俚做仔一户客人，要客人有长性，可以一直做下去，故末俚搭客人要好哚。俚搭客人要好仔，陆里有啥脾气嗄？俚就碰着仔无长性客人，难末要闹脾气哉。俚闹起脾气来，（要勿）说啥勿肯巴结，索性理也勿来理耐（口宛）。汤老爷阿是？第歇耐罗老爷末好像倪翠凤勿巴结了动气，陆里晓得倪翠凤心里搭罗老爷倒原蛮要好，倒是耐罗老爷勿是定归要去做俚，俚末也勿好来陪巴结耐哉（口宛）。俚也晓得蒋月琴搭罗老爷做仔四五年哉，俚有辰光搭我说起，说：‘罗老爷倒有长性哚，蒋月琴搭做四五年末，来里倪搭做起来阿会推扳嗄？’我说：‘耐晓得罗老爷有长性末，为啥勿巴结点囗？’俚也说得勿差，俚说：‘罗老爷有仔老相好，只怕倪巴结匆上，倒落仔蒋月琴哚笑眼里。’俚是实概意思。要说是俚勿肯巴结耐罗老爷，倒冤枉仔俚哉。我说罗老爷，耐故歇坎坎做起，耐也匆曾晓得倪翠凤个脾气，耐做一节下来，耐就有数目哉。倪翠凤末也晓得耐罗老爷心里是要做俚，难末俚慢慢仔也巴结起来哚。”

子富听了，冷笑两声。黄二姐也笑道：“阿是耐有点勿相信我闲话？耐问声汤老爷看，汤老爷蛮明白哚。汤老爷，耐想囗，倘然俚搭罗老爷勿要好末，罗老爷陆里叫得到十几个局嗄？俚心里来哚要好，嘴里终勿肯说出来，连搭娘姨、大姐哚才匆晓得俚心里个事体，单有我末稍微摸着仔点。倘然我故歇放罗老爷去仔，晚歇俚转来就要埋冤我哉（口宛）。我老实搭罗老爷说仔罢：俚做大生意下来，也有五年光景哉，通共就做仔三户客人，一户末来里上海，还有两户，一年上海不过来两埭，清爽是清爽得野哚。我再要俚自家看中仔一户客人，搭我多做点生意，故是难杀哚囗。推扳点客人（要勿）去说哉，就算客人末蛮好，俚说是无长性，只好拉倒，教我阿有啥法子嗄？为此我看见俚搭罗老爷蛮要好末，望罗老爷一直做下去，我也好多做点生意。勿然是老实说，像罗老爷个客人到倪搭来也勿少（口宛），走出走进，让俚哚去，我阿曾去应酬歇？为啥单是耐罗老爷末要我来陪陪耐嗄？”

子富仍是默然，汤啸庵也微微含笑。黄二姐又道：“罗老爷做末做仔半个月，待倪翠凤也总算无啥，不过倪翠凤看仔好像罗老爷有老相好来哚，倪搭是垫空个意思。我倒搭俚说：‘耐也巴结点，有啥老相好、新相好，罗老爷阿会待差仔倪嗄？’俚说：‘隔两日再看末哉。’前日仔俚出局转来，倒搭我说道：‘无(女每)，耐说罗老爷搭倪好，罗老爷到仔蒋月琴搭吃酒去哉。’我说：‘多吃台把酒是也算勿得啥。’陆里晓得倪翠凤就多心哉囗，说：‘罗老爷原搭老相好要好末，阿肯搭倪要好嗄？’”