正自心焦，恰好李秀姐复进房，向漱芳道：“稀饭好哉，吃仔口罢。”漱芳道：“无(女每)，我无啥呀。故歇吃勿落，晚歇吃。”秀姐道：“价末晚歇要吃末，耐说。我困仔，俚哚陆里想得着？”漱芳应诺，转问秀姐道：“浣芳出局去仔歇哉，还勿曾转来？”秀姐道：“浣芳要转局去。”漱芳道：“浣芳转局去仔末，耐也教个相帮去张张二少爷囗。”秀姐道：“相帮才出去哉。二少爷搭有大阿金来浪。”漱芳道：“等相帮转来仔，教俚哚就去。”秀姐道：“等俚哚转来等到啥辰光去！我教灶下去末哉。”即时到客堂里喊灶下出来，令他“去张张陶二少爷”。

灶下应命要走，陶玉甫却已乘轿来了，大阿金也跟了回来。秀姐大喜道：“来哉，来哉！（要勿）去哉。”玉甫径至漱芳床前，问漱芳道：“等仔半日哉，阿觉着气闷？”漱芳道：“无啥。台面阿曾散？”玉甫道：“勿曾囗。老老头高兴得来，点仔十几出戏，差勿多要唱到天亮哚。”漱芳道：“耐先走末，阿搭俚哚说一声？”玉甫笑道：“我说有点头痛，酒也一点吃勿落。俚哚说：‘耐头痛末转去罢。’难末我先走哉（口宛）。”漱芳道：“阿是真个头痛嗄？”玉甫笑道：“真是真个，坐来浪末要头痛，一走就匆痛哉。”漱芳也笑道：“耐末也刁得来，怪勿得耐阿哥要说。”玉甫笑道：“阿哥对仔我笑，倒勿曾说啥。”漱芳笑道：“耐阿哥是气昏仔了来浪笑。”玉甫笑而不言，仍就床沿坐下，摸摸漱芳的手心，问：“故歇阿好点？”漱芳道：“原不过实概哉囗。”又问：“夜饭吃几花？”漱芳道：“勿曾吃。

无(女每)燉稀饭来浪，耐阿要吃？耐吃末，我也吃点末哉。”玉甫便要喊大阿金，大阿金正奉了李秀姐之命来问玉甫：“阿要吃稀饭？”玉甫即令搬来。

大阿金去搬时，玉甫向漱芳道：“耐无(女每)要骗耐吃口稀饭，真真是匆容易！同多吃点，无(女每)阿要快活？”漱芳道：“耐倒说得写意哚。我自家蛮要吃来里，吃勿落末那价呢？”

当下大阿金端进一大盘，放在妆台上，另点一盏保险台灯。玉甫扶漱芳坐在床上，自己就在床沿，各取一碗稀饭同吃。玉甫见那盘内四色精致素碟，再有一小碗五香鸽子，甚是清爽，劝漱芳吃些。漱芳摇头，只夹了些雪里红过口。

正吃之时，可巧浣芳转局回家，不及更衣，即来问候阿姐；见了玉甫，笑道：“我说姐夫来仔歇哉。”又道：“耐除来里吃啥，我也要吃个。”随回头叫阿招：“快点搭我盛一碗来囗。”阿招道：“换仔衣裳了吃囗，啥要紧嗄。”浣芳急急脱下出局衣裳，交与阿招，连催大阿金去盛碗稀饭，靠妆台立着便吃；吃着又自己好笑，引得玉甫、漱芳也都笑了。

不多时，大家吃毕洗脸。大阿金复来说道：“二少爷，无(女每)请耐过去说句闲话。”玉甫不解何事，令浣芳陪伴漱芳，也出后房门，踅过后面李秀姐房里。秀姐迎见请坐，说道：“二少爷，我看俚病倒勿好囗。单是发几个寒热，故也无啥要紧，俚个病勿像是寒热呀。从正月里到故歇，饭末一径吃勿落；耐看俚身浪，瘦得来单剩仔骨头哉！二少爷，耐也劝劝俚，该应请个先生来，吃两贴药末好囗。”玉甫道：“俚个病，旧年冬里就该应请个先生来医治医治。我也搭俚说仔几转哚，俚定归勿肯吃药，教我也无法子。”秀姐道：“俚是～径实概脾气，生仔病末勿肯说出来，问俚总说是好点。请仔先生来教俚吃药，俚倒要匆快活哉。不过我来里想，故歇该个病勿比仔别样，俚再要匆肯吃药，二少爷，勿是我说俚，七八分要成功哉囗！”玉甫垂头无语。秀姐道：“耐去劝俚，也（要勿）说啥，单说是请个先生来，吃两贴药末好得快点。耐倘然老实说仔，俚心里一急，再要急出啥病来，倒加二勿好哉。二少爷，耐末也（要勿）急，就急杀也无么用。俚个病终究勿长远，吃仔两贴药还勿要紧囗。”玉甫攒眉道：“要紧是勿要紧，不过俚也要自家保重点末好。

随便啥事体，推扳一点点，俚就匆快活。耐想，俚病陆里会好？”秀姐道：“二少爷，耐是蛮明白来浪。俚自家晓得保重点，也无拨该个病哉，才为仔勿快活了起个头（口宛）。故末也要耐二少爷去说说俚，俚还好点。”

玉甫点头无语。秀姐又说些别的，玉甫方兴辞，原回漱芳房来。漱芳问道：“无(女每)请耐去说啥？”玉甫道：“无啥，说屠明珠搭阿是烧路头。”漱芳道：“勿是该个闲话，无(女每)来浪说我（口宛）。”玉甫道：“无(女每)为啥说耐？”漱芳道：“耐（要勿）来骗我，我也猜着个哉。”玉甫笑道：“耐猜着仔末，再要问我？”漱芳默然。

浣芳拉了玉甫踅至床前，推他坐下；自己爬在玉甫身上，问：“无(女每)真个说啥？”玉甫道：“无(女每)说耐勿好。”浣芳道：“说我啥勿好？”玉甫道：“说耐勿听阿姐个闲话；阿姐为仔耐勿快活，生个病。”浣芳道：“再说啥？”玉甫道：“再说末，说耐阿姐也匆好。”浣芳道：“阿姐啥勿好嗄？”玉甫道：“阿姐末勿听无(女每)个闲话。听仔无(女每)，吃点鸦片烟，寻寻开心，陆里会生病嗄。”浣芳道：“耐瞎说！啥人教阿姐吃鸦片烟？吃仔鸦片烟加二勿好哉！”

正说时，漱芳伸手要茶。玉甫忙取茶壶，凑在嘴边吸了两口，漱芳从容说道：“倪无(女每)是单养我一干仔。我有点勿适意仔，俚嘴里末勿说，心里是急杀来浪。

我也巴勿得早点好仔末，让俚也快活点，陆里晓得一径病到仔故歇还勿好。我自家拿面镜子来照照，瘦得来是匆像啥人个哉！说是请先生吃药，真真吃好仔也无啥，我该个病陆里吃得好嗄！旧年生仔病下来，头一个先是无(女每)急得来要死，耐末也无拨一日舒舒齐齐。我再要请先生哉、吃药哉，吵得一家人才匆安逸。娘姨、大姐做生活还忙杀来浪，再要搭我煎药，俚哚生来勿好来说我，说起来终究是为我一干子，病末倒原勿好，阿是无啥意思？”玉甫道：“故是耐自家来里多心再有啥人来说耐？我说末，勿吃药也无啥，不过好起来慢性点；吃两贴药末早点好。耐说阿对？”漱芳道：“无(女每)定归要去请先生，故也只好依俚。倘然吃仔药原勿好，无(女每)加二要急杀哉。我想，我从小到故歇，无(女每)一径稀奇杀仔，随便要啥，俚总依我。我无拨一点点好处拨俚，倒害俚要急杀快，耐说我陆里对得住俚？”玉甫道：“耐无(女每)就为仔耐病，耐病好仔，俚也好哉，耐也无啥对勿住。”漱芳道：“我自家生个病，自家阿有啥勿觉着？该个病，死末勿见得就死，要俚好倒也难个哉。我是一径常恐无(女每)几个人听见仔要发极，一径勿曾说，故歇也只好说哉。耐末也白认得仔我一场：先起头说个儿花闲话，（要勿）去提起哉；要求该世里碰着仔，再补偿耐。我自家想，我也无啥豁勿开，就不过一个无(女每)苦恼点。

无(女每)说末说苦恼，终究有个兄弟来里，耐再照应点俚，还算无啥，我就死仔也蛮放心。除脱仔无(女每)，就是俚。”说着，手指浣芳，“俚虽然勿是我亲生妹子，一径搭我蛮要好，赛过是亲生个一样。我死仔，倒是俚先要吃苦，我故歇别样事体才匆想，就是该个一桩事体要求耐。耐倘然勿忘记我，耐就听我一句闲话：依仔我，耐等我一死仔末，耐拿浣芳就讨仔转去，赛过是讨仔我。隔两日，俚要想着我阿姐个好处，也拨我一口羹饭吃吃，让我做仔鬼也好有个着落，故末我一生一世事体也总算是完全个裁。”

漱芳只管唠叨，谁想浣芳站在一倍，先时还怔怔的听着，听到这里，不禁“哇”的一声竟哭出来，再收纳不住。玉甫忙上前去劝。浣芳一撒手，带哭跑去，直哭到李秀姐房里，叫声“无(女每)”，说：“阿姐勿好哉呀！”秀姐猛吃一吓，急问：“做啥？”浣芳说不出，把手指道：“无(女每)去看囗！”秀姐要去看时，玉甫也跑过来，连说：“无啥，无啥。”遂将漱芳说话略述几句，复埋冤浣芳性急。秀姐也埋冤道：“耐啥一点勿懂事！阿姐是生仔病了，说说罢哉，阿是真个勿好哉凰”